Umutwe wa M23 ku Cyumweru tariki ya 9 Werurwe, wigaruriye agace ka Nyabyondo ko muri Teritwari ya Masisi mu ntara ya Kivu y’Amajyaruguru.
M23 yigaruriye aka gace, nyuma y’imirwano ikomeye yasakiranyije ingabo zayo n’Ingabo za Leta ya RDC (FARDC) zafashwaga n’inyeshyamba zo mu mutwe wa APCLS wa Gen Janvier Karairi.
Agace ka Nyabyondo M23 yigaruriye, gafatwa nk’umurwa mukuru wa segiteri ya Osso-Banyungu. Ni agace gaherereye mu bilometero bibarirwa mu 110 uvuye mu mujyi wa Goma.
Radio Okapi ivuga ko imirwano yo muri aka gace yabaye mu mvura y’amahindu yatumye abaturage bahunga ku bwinshi, berekeza i Kashebere.
Iyi Radiyo y’Umuryango w’Abibumbye inavuga ko ifatwa rya Nyabyondo ryafunguriye M23 amarembo yo kwinjira muri Teritwari ya Walikale, iri muri nkeya zigize Kivu y’Amajyaruguru izi nyeshyamba zitarigarurira.
